O dama wydn vy a wre creji e'n dus vian.

 

Benyn fur o Gladys Trenowth, ha cas o genjy trynn ha flows. Bes thera fayys a dhelergh dhe'n lowarth, ha nag era dout veth dhedhy. Feth sempel o, avel an gwyns bo an glaw. Thera spyryjyon en pub le, puptra, pub pres.

 

Na wruga vy besketh gweles an dhama wydn en eglos, nag e'n vedhegva. Marnas ort diwedh hy bownans, pan o hei bian, skith ha terrys en gwely clavjy. Kens hedna, termyn hei o clav, hei a whilas cur a lojow ha bleujyow e'n keow ha'n coos. Nag era fysek veth ken e'n chei, saw vitamyn C hag oyl avy an barvus, dr'wre hei rei dhen, an flehes, en lo vras pub nos. Nei a wre omwen hag eva an syrop plos, nena crambla e'n gweliow uhel gen liednow cras ha lednow debronek.

 

Hei a veu genys en bledhen 1908, kens an Vresel Veur, e'n pluw Lannaled. Termyn hei a veu mos, hei a wre cuntel sevy dhe dhanon dhe'n varhas en Loundres e’n tren. Oja hedna hei a veu magores dres lies bledhen o meythrin an flehes a deylu golusek a Gernow. Wortalleth, then'jei trigys en chei bras ogas dhe Druru, nena en Wordhen dres an vresel, hag en Sussex en Pow an Sowson oja hedna. Bes thera hy holon en Kernow pub pres, ha hei a dhewhelas en hy henys dhe chei bian en Downderry gen gwel adreus an mor.

 

An bledhen hei a veu merwys - nanj ew moy es ugens bledhen - my eth dhe Japan. Obma thera vy o cawas spyryjyon ewedh, en pub le, puptra, pub pres. Bes obma thera fayys gen templow teg ha solempnitys bryntin. Then'jei henwys "kami" e'n crejyans a Japan henwys Shinto. Nag ew kami duwow, bes spyryjyon, bo martesen whei a alja leverel "natur hy honan”. En gwir, ma hei o pew whath en Japan hedhyw, an fedh goth vel hedna a'n Geltoryon en termyn eus passyes, an fedh dr'era dhe'm dama wydn vy heb y gonvedhes.

 

Ytho lebmyn thera vy o corra warbarth o diwla vy hag omblegya dhe'n menedh, an veyn, an awon ha'n bleujyow rag m'alla vy ajon gras dhe'n dus bian ennans, ha dhe'm dama wydn vy ewedh.